Aalisarneq pillugu ataatsimiititaliarsuaq ukiuni marlunni suliaqareeraluartoq aamma politikkerinut innuttaasunullu inassuteqaamminik aggustip qaammataani saqqummiussinissa naatsorsuutigineqaraluartoq, Aalisarnermut Piniarnermullu Naalakkersuisup Aqqaluaq B. Egedep nalunaarutigaa, aalisarneq pillugu inatsisissaq nutaaq siusinnerpaamik 2022-mi ukiakkut ataatsimiinnermi saqqummiunneqassasoq.

Aqqaluaq B. Egedep pisariaqarnerarpaa, Aalisarneq pillugu ataasimiititaliarsuarmit saqqummiunneqartup aalisartut akornanni oqallisigineqarluarnissaa.

Kalaallit Nunaanni Sulisitsisut pisortaata Christian Keldsenip qujamasuutigaa, suliap ingerlanneqarnerata sivitsorneqarnera.

Inatsit piffissami sivisuumi atuuttussaq

- Aalisarneq pillugu inatsisissap peqqissaarullugu suliarineqarnera naammagisimaarparput, taamatut suliarineqarmat neriunarpoq, inatsit piffissami sivisuumi atuutsinneqassasoq, Sulisitsisut pisortaat oqarpoq.

- Aalisarnermik inuussutissarsiuteqartut suliap ingerlanneqarnerani tusaaneqanngitsutut misigisimassagunik, maanna periarfissaqalerput, inatsisissap suliarineqarluarnerani peqataatinneqartutu misigisaqalernissamut, Christian Keldsen erseqqissaavoq.

Aqqaluaq B. Egedep ilisimatitsitsissutiginikuuaa, aalisarnermik inuussutissarsiuteqartunut seminareqartitsinissamik aalisarnermut naalakkersuisoqarfik pilersaaruteqartoq, tassa Aalisarneq pillugu ataatsimiititaliarsuup inassuteqaatai saqqummiunneqassallutik.