Assartuineq aappaagu 6,4 procentimik akitsortussaammat, sulisitsisut kattuffiannit kaammattuutigineqarpoq RAL-ip ukiuni tallimat arfineq-marlullu akornanni ingerlasimanera eqqarsaatigalugu politikerit inuussutissarsiortunik oqaloqateqartariaqalersut.

- Periusinik allannguinerit inuussutissarsiortut peqataatinnagit kissaatiginngisaannilluunniit pisimapput, pisariaqalerporlu politikkikkut akisussaaffimmik tigusisoqarnissaa peqataatitsinissallu qulakkeernissaa, Sulisitsisut pisortaat Christian Keldsenip Ineqarnermut Attaveqaasersuutinullu Naalakkersuisoqarfimmut allagaani, Sermitsiaq.AG-p allagaatinik takunnissinnaanermik piumasaqarnermini pissarsiarisimasaani, taama allassimavoq.

- Siunnersuutigaarput Naalakkersuisut atuisunut attaveqaasersuuteqarneq pillugu oqaloqatiginnilissasut, Christian Keldsen allappoq erseqqissarlugulu "RAL-ip pisortaqarfianut attaveqarneq pitsaasuusoq".

Kaammattuut: Isumasioqatigiissitsigitsi

Sulisitsisut kissaatigaat attaveqaasersuuteqarneq pillugu isumasioqatigiissitsisoqassasoq, Royal Arctic Linep Verner Hammekenip pisortaanerata nalaani allanngortiterisimanerata kingunerinik ukkassisussamik.

- Allannguinerit annertuallaarujussuaqaat siulersuisut kisiisa sulisillugit politikerinit isummerfigineqannginnissaannut. Inuaqatigiinni ataqatigiissitsisoqartariaqarpoq, tamannali pissutissaqanngivissumik aarlerinartorsiortinneqarpoq, Sulisitsisut isumaqarput.

Sulisitsisut saaffiginnissutiminni erseqqissarpaat RAL-ip ukiuni kingullerni allanngortiterinera inuussutissarsiortunit kissaatigineqarsimanngitsoq, akitsuinernillu arlaannaatigulluunniit iluaqutitaqanngitsunik kinguneqaannarsimasoq.