- Unamminitsinni ippassaq isiginnaartut tupinnaqaat, assingusumik takusaqarnikuunngisaannarpunga.

Kalaallit Uruguayimut ippassaq ajugaanerannut atatillugu assammik arsartartut nunanut allanut unammisartut sungiusaasuat Ingi Olsen Sermitsiaq.AG-mut oqarpoq. Isiginnaartut aamma qujaffigai.

- Unammineq naammassereeraluartoq inuppasuit suli najuullutik nuannaaqatigaatigut. Uruguayermiut aamma unammiffimmiiginnarput nuannisangaaramik, oqaluttuarpoq.

- Unamminersi qanoq nalilersinnaaviuk?

- Uruguayikku pitsassuupput. Eqqaniittuat titarnerullu killinganiittuat unammilluaqaat. Ajoraluartumik to minutsini anisitaanigut arlaqarput, nukippassuarnik atuiffiulluni. Saassussinermi ajornanngitsumik isaatitsivugut, Uruguayermiulli saassussinerat unitsikkuminaatsipparput. Arlaleriarlutik aamma strafferput, Ingi Olsen akivoq.

Titarnerup killinganiittartoq ajoqquseqqalaaqqavoq
Eqalunnguaq Kristiansen seeqqukkut ajoqquseqqalaartoq oqaatigaa. Unamminermi siullermi ajoqqusersimasoq ilisimatitsissutigaa.

- Taamaattumik paarisariaqarparput ajoqqusernera ajornerulerseqqunagu. Andreas Lorentzen anisitaammat unamminerup sinnera isersimavoq, tamanna ajornartorsiutiginngilaa, oqarpoq.

Unammisartut tatisimaneqarneq anigorluarpaat
Uruguayimut unammineq naammassilermat pissanganartorujussuuvoq. Kalaallit unammisartut tamanna anigorluarmassut nersualaarpai.

- Taamatut pissanganartumik unammissaq piareersarluarfiginikuuarput. Miki Heilmann aamma Nuka Heilmann tamanna anigorluarsinnaagaat nalunngereerparput, unammeqataaqqaartullu aamma piffissami pissanganartumi isersimatinngilagut. Unamminerup naammassilernera imaannaanngitsorujussuuvoq, Ingi Olsen oqarpoq.

Pan Am-imi ullumi unammisoqassanngilaq. Kalaallit brasiliamiunut aqagu pingasunngornermi unammissapput.