Sunngiffimmi piniarnermut allagartavit nutarternissaa eqqaamassavat
Ukioq manna tuttunniarnermi umimmanniarnermilu peqataarusukkuit sunngiffimmi piniarnermut allagartavit maajip ulluisa aallaqqaataat nallertinnagu nutartereersimassavat.
Aalisarnermut Piniarnermullu Naalakkersuisoqarfimmiit matumuuna eqqaasissutigaa 2018-imi aasakkut ukiakkullu tuttunniarnissamut umimmanniarnissamullu akuersissutinik qinnuteqarsinnaanissamut sunngiffimmi piniarnermut allagartap tuttut umimmaallu pillugit nalunaarutit atuuttut naapertorlugit maajip aallaqqaataa sioqqullugu akilereerneqarnissaa.
- Sunngiffimmi piniarnermut allagartaq taamaalilluni kingusinnerpaamik apriilip 30-anni 2018-imi akilereersimassaaq tuttunniarnissamut umimmanniarnissamullu akuersissutinik qinnuteqarniaraanni, naalakkersuisoqarfik nalunaaruteqarpoq.
Tamanna pillugu maajip aallaqqaataani kingusinnerusukkulluunniit sunngiffimmi piniarnermut allagartamut akiliisimasut 2018-imi aasakkut ukiakkullu tuttunniarnissamut umimmanniarnissamullu akuersissutinik qinnuteqarsinnaassanngillat.
Akuersissutit utertinneqassapput
Ilutigalugu APN-ip paasisimavaa ajoraluartumik tuttunniarnissamut umimmanniarnissamullu akuersissutit tunniunneqartartut affai inorlugit utertinneqartartut.
- Akuersissutit pisanillu nalunaaruteqarneq piniarnerup naammassineqarnerata kingornatigut kingusinnerpaamik sapaatip akunnerisa marluk qaangiunneranni utertinneqartussaapput tamannalu pisaqarsimanngikkaluaraanniluunniit aamma atuuppoq. Pisanut nalunaarutit amigartumik utertinneqartarnerat pillugu tuttoqatigiit umimmaqatigiillu qanoq innerat nalileruminaappoq.
