Tigummigallarneqartut qimaasut politiit tigusaraat
Jakob Karlsenip aamma Nukaaraq Reimerip, Aasianni pineqaatissinneqarsimasunut inissiisarfiannit qimaanerannit, politiit ujaasinerat pilertortumik kinguneqarpoq. Innuttaasup saaffiginninnerata kingorna taakku tigusarineqarput.
Aasianni pineqaatissinneqartunut inissiisarfimmit qimaasut ujaarineqarnerannit politiit nalunaaruteqarnerisa kinguninngua innuttaasumik saaffiginnittoqarpoq. Politiit tusagssiuutinut nalunaarummi taama ilisimatitsipput.
Qimaariaraluartoq
Tigusarinninneq toqqissisimavallaanngitsumik pivoq.
- Tigummigallarneqartup aappaa tigusarineqalerami qimaariaraluarpoq, kisianni politiit ajornartorsiutigivallaarnagu tigusaraat, politiit pigaartuat Henrik Vedel Nielsen, Sermitsiaq.AG-mut taama oqaluttuarpoq.
Tallimanngornermi unnukkut kingullermik takuneqartut
Inissiisarfimmi nakkutilliisut kingullermik nalunaaqutaq 21.30 taakku angutit marluk kingullermik takusimagaat, taanna oqaluttuarpoq. Kisianni nakkutilliisut arfininngornermi ullaakkut nerisassanik pajussimmata qimaareersimapput.
- Qanoq qimaasimanerat ilisimaqqissaanngilarput, tamanna misissuleruttorparput. Unnuap ingerlanerani qimaasimapput, politiit pigaartuat oqarpoq.
Inissiisarfiup tungaanit qanoq pisoqarsimanera misissorneqaleruttortoq, Henrik Vedel Nielsen naqissusiivoq, taamatullu pisoqaqqinnginnissaa aamma sulissutigineqassasoq.
