Timmisartoq sukkasuuliaq mittarfiup sinaaniippoq, massakkulli Nuummiit Nuummullu timmisartuussinernik tamaginnik uninngatitsilluni. Nuummi Mittarfimmi timmisartuussinerit tamarmik nalunaaqutaq 17.20 tungaanut unitsinneqarallarput, Mittarfeqarfiit paasissutissiipput.

Unittaat ajoqusertoq

- Timmisartup unittaataata aappaata ajoqusersimasinnaanera, minnialernermi akornusiisimasinnaanera, timmisartortartup nassuiaatigisimangaa, Mittarfeqarfiit ingerlatsinermut pisortaa Niels Grosen Sermitsiaq.AG-mut nassuiaavoq.

Ilaasut marluk naliginnaasuunngitsumik missingaluarlutik annertunerusumik ajoqusersimannginnerat nuannaarutigaa. Timmisartoq Canadamiit Nuuk aqqusaarlugu Islandimut ingerlaarsimavoq, Nuummilu unnuinissaq pilersaarutigineqarsimalluni.

Ajutoortoqarsimatillugu paasiniaasartut

- Timmisartuussinerit aallarteqqinnissaat pillugu, Danmarkimi ajutoortoqarsimatillugu paasiniaasartut attaveqarfigaangut, Niels Grosen nassuiaavoq.

Taakku akuersissuteqarnissaannut akunnialuit ingerlaqqaarnissaat, taassuma naatsorsuutigaa.

"Pisup" sooq pisimanera unittaalli ilumut ajutoornermut pissutaasimanersoq, politiit aamma ajutoortoqarsimatillugu paasiniaasartut paasiniaavigissavaat.

Mittarfiup matoqqanerani Air Greenlandip tikiffissaani arfineq marlunni ilaasussat 200-t missaanniittut eqqorneqarput, tikittussanillu tallimat Kangerlussuarmut ingerlateqqinneqassapput, Air Greenland tusagassiuutinut nalunaaruteqarpoq.

- Mittarfik ammariarpat angalanissanut pilersaarut nutaaq ikkunneqassaaq, ilaasussallu angalanissamut pilersaarut nutaaq pillugu ilisimatinneqarumaarput, timmisartuutileqatigiiffik paasissutissiivoq.

Allaaserisap ataani assit takukkit: