Nuummi Iggiaani toqutsisoqarnerani suliamut atatillugu kavaajaq aappaluttortalik ujarneqartoq politiit maanna nassaarisimalerpaat. Politiit taamaakkaluartoq Nasiffiup angallatillu puttasoqarfiata nalaani sisamanngornerup unnuaani piffissami nalunaaqutaq 01.00 aamma 03.00 akornanni qanoq pisoqarneranik ilisimannittunit tusagaqarnissartikkit kissaatigaat.

Eqqartuussiveqarfik Sermersuup arfininngornermi ualikkut tunngaviusummik inatsik naapertorlugu killisiuinermi angut 30-t naalerneranni ukioqartoq, angummik 60-nik ukiulimmik toqutsisimasutut pasineqartoq tigummigallagassanngortippaa.

Unnerluussisussaatitaasup Nanna Werther oqarnera naapertorlugu, angut 60-nik ukiulik angallatinut puttasoqarfiup tungaanut kalinneqannginnermini annertuumik persuttarneqarpoq, tassanilu ullaakkut Iggiaani toqungasoq nassaarineqarpoq.

Toqutsinermut pissutaasumik politiit suli nassuiaasiornertik suliaraat.

Politiit nalunaarutaat naapertorlugu angut tigummigallarneqartoq pisumik eqqaamasaqannginnerarluni pinngitsuunerarpoq, kisianni tigummigallarneqarnissaminik aalajangerneq akueraa.