Nunarput Island Gamesertoqarnerani maannamut ataatsimik medaaliannatsitaqarpoq.

Nerrivimmik arsaararlutik unammisartut iligiikkuutaarnermi sølvinnallutik, Nunatsinnut medaaliannatitsisuupput.

Taamaattoq Nunarput arlalinnik medaaliannatsitaqarnissamik suli periarfissagissaarpoq.

Medaaliannattassat

Sulorarnermi Sara Lindskov arnat ataasiakkaarnerini pissartanngorniutivissaaq, semifinalimi siullertut inissereersimasoq Savalimmiormiu Rannvá Djurhuus Carlsson ajugaaffigisimallugu.

Sara Lindskovip Jessica Li pissartanngorniutivinnermi unammissavaa, taanna kingullermik Island Games Jersey-imi ingerlanneqarnerini ajorsarfigisimavaa.

Jens-Frederik Nielsenip aamma Bror Madsenip Albert Navarro aamma Eric Navarro Comes Menorcaminngaanneersut angutit sulorarnermik iligiiaarnerini pissartanngornioqatigeqqissavaat. Taakku aamma ukiut marluk matuma siorna Jersey-imi pissartanngorniutivipput, tassanilu kalaallit pissartanngorniutivinnermi ajugaapput.

Angutit isikkamik arsaattartut Isle of Man pissartanngorniutivinnermi unammissavaat, unammineq Nunatta nalunaaqutaa malillugu 09.00 aallartissaaq.

Arlalinnik medaaliannassinnaasut

Nerrivimmi arsaararnermi Ivik Nielsen semifinalimi unammassissaaq. Taassuma pissartaq, Nisse Lundberg Gotlandimiu semifinalimi unammissaavaa.

Ivik Nielsen qatanngutinilu, Aqqaluk Nielsen angutit iligiiaarnerini aamma semifinalimi unammeqatigiissapput. Taakku Joshua Band aamma Jordan Wykes unammissallugit.

Suna tamarmik iluatsissappat, Nunarput Island Gamesertoqarnerani katillugit arfinilinnik medaaliannatsitaqarsinnaavoq.