Nunanut allanut tunngasunut naalakkersuisoq, Vivian Motzfeldt (S), Issittumi aningaasaqarnikkut suleqatigiinnerup nukittunerunnginnera ugguaraa. ICC-p ataatsimeersuarnerani ilanngussami ilaanni taama oqarpoq.

Inuit inuiaqatigiit unammilligassaat assigiittut aamma nukissat ilaatigut assigiittut.

Ajoraluartumilli piviusoq tassaavoq Alaska, Canadap issittortaa Kalaallit Nunaallu imminnut qanikkaluarlutik ataatsimut kingornussaqaraluarluta aammalu illoqarfiit pingaarnersai imminnut suleqatigiikkaluartut Inuit Kalaallit Nunaanniittut aammalu Amerikap Avannaaniittut illuanullu suleqatigiinneq aningaasaqarnikkullu paarlaasseqatigiinnermi suleqatigiinneq pitsaanngilaq, tamannalu ataqatigiinnermi pitsaanngitsumik aaqqissuussineq pissutaavoq, Vivian Motzfeldt oqarpoq.

Sikukkut Qaanaap aamma Aujuittuqip akornanni niueqatigiittoqartarsimagaluartoq oqaatigaa, kisianni taamaattoqarunnaarsimavoq.

Niueqatigiittoqaleqqissinnaaneranulli periarfissanik takuvoq.

Tassani taassuma RAL-ip periusissaa nutaaq aamma mittarfinnut nutaanut pilersaarutit taakkartorpai.

RAL-ip Eimskipimik suleqateqarnera taassuma oqarnera naapertorlugu, umiarsuarmik angallassinerup Reykjavik aqqusaarlugu Europamut kangimuinnaq ingerlajunnaarnissaanik isumaqarpoq, kisianni umiarsualivik containereqarfiusoq aamma Amerika Avannarlermut atassuteqalersinnaanerarpaa.

Mittarfiit nutaat attaveqaataanni assingusumik aamma periarfissaqarnerarpaa.

- Piffissaq apeqqutaaginnarpoq qaqugu Canadamut USA-mullu silaannakkut angallannikkut aqqutit ammaanneqaqqinnissaannut. Tamannalu siusinnerusinnaaguni pitsanerussaaq.

- Naggueqativut Inuit aqqutissat taakku atorlugit attaveqalernissamut soqutiginninnissaat neriuutigaarput.