Danmarkip Naalagaaffiata Nunani Avannarlerni Siunnersuisoqatigiinnut aallartitaasa siulittaasuat, Lars-Christian Brask siunnersuuteqaraluarpoq nunat arfineq-pingasut tamarmik Nunat Avannarliit Siunnersuisoqatigiiffiata siulittaasoqarfiani ilaasortaatitaqalissasut.

Tassa imaappoq Danmark, Sverige, Norge, Island, Finland, Savalimmiut, Åland aammalu Kalaallit Nunaat tamarmik siulittaasoqarfimmiititaqalissasut, tassanilu aallartitat siulittaasui ilaasortanngortinneqartassasut.

Taamaattorli Savalimmiut sinnerlugit folketingimi ilaasortaq Anna Falkenberg isumaqarpoq, qularnarpallaartoq ilumut Savalimmiut Kalaallit Nunaallu siulittaasoqarfimmi aalajangersimasumik ilaasortanngorsinnaanersut. Taamaammat taassuma siunniuppaa aallartitat siulittaasuata siulittaasoqarfimmi ilaasortanngorsinnaanerata saniatigut aamma siulittaasup tullii ilaasortanngorsinnaanissaminnut periarfissinneqartariaqartut, tamannalu Aaja Chemnitzip ilalerpaa:

- Ilalerparput Kalaallit Nunaat aamma Savalimmiut siulittaasoqarfimmi ilaasortaatitaqalernissaannik siunertaqarneq. Taamaakkaluartoq ernumanarsinnaavoq, Kalaallit Nunaata Savalimmiullu siulittaasoqarfimmut ilanngutinngitsoornissaat. Taamaammat siunnersuut ilarusunnikuuarput siulittaasut tullii toqqarneqarsinnaalersillugit, taava periarifissat annertunerulissapput. Assersuutigiinnarlugu naalagaaffiit allat Kalaallit Nunaata nammineerluni aallartitaqalernissaanik akuersaanngitsuussappata, siulittaasup tulliata toqqarneqarsinnaaneratigut periarfissaqarnerussaagut.

- Siunnersuuteqartummi qulakkeerniarsarivaa Kalaallit Nunaat Savalimmiullu siulittaasoqarfimmi ilaasortanngortinneqassasut, tassami siunnersuuteqartup siunertaraa nunat arfineq pingasut tamarmik siulittaasoqarfimmiititsilissasut?

- Tamanna iluatsissinnaassappat, taava piumasaqaataassaaq nunat pingasut namminneq aallartitaqartalernissaat, tassa Kalaallit Nunaat, Savalimmiut aammalu Danmark tamarmik immikkut aallartitaqartalissasut, ullumikkutut itsillugu nunat naalagaaffittut inissisimasut kisimik siulittaasoqarfimmiissinnaammata.

- Taannami (Lars-Christian Brask) qulakkeerinninniarsarivoq nunat arfineq pingasut tamarmik siulittaasoqarfimmi ilaasortaassalissasut, tassa Kalaallit Nunaat Savalimmiullu ilanngullugit?

- Aap, kisianni aallartitat ataasiinnaapput, taamaammat Kalaallit Nunaat ilaasortaasinnaanissaanut qulakkeerussinnaassagutsigu, taava aamma siulittaasut tullii toqqarneqarsinnaasunngortinneqartariaqarput, tassami Danmarkip aallartitai ataasiinnaammata.

- Taava isumaqarputit taassuma siunnersuutaa siunertaqanngitsoq Kalaallit Nunaata Savalimmiullu siulittaasoqarfimmi inissaqartinneqalernissaannik?

- Siunnersuut sanngiiffeqarpoq, tamannalu akunnitsinni oqaloqatigiissutigisariaqarparput tusagassiorfitsigut oqaloqatigiissutiginagu.

"Christiansborgimi pissaaneqarniunneq"

- Siunnersuummimi paatsoorneqarsinnaanngitsumik allaqqavoq siunnersuutip saqqummiunneqarneranut siunertarpiaasoq Kalaallit Nunaata Savalimmiullu Nunat Avannarliit siunnersuisoqatigiiffiata siulittaasoqarfiani aalajangersimasumik ilaasortaatitaqalissasut. Qanoq ililluni qularnarsinnaagami, siunnersuutip qiterpiarippagu Kalaallit Nunaata, Savalimmiut Ålandillu inissaannik qulakkeerinninniarnerusoq?

Taassuma nassuerutigaa suliamik matuminnga suliaqarneq assut tukassimasoq:

- Nunat Avannarliit Siunnersuisoqatigiiffianni aalajangersimasumik ilaasortaanngilanga, matumanili suliap ingerlanneqarnissaani ataatsimiititaliamut isertinneqarnikuullunga. Ajoraluartumik suliap ingerlanneqarniarnera "Christiansborgimi pissaaneqarniunnermut" sangutinneqarnikuuvoq, tamannalu qimanniartariaqarparput suliarpullu uterfigalugu, tassalu Kalaallit Nunaata Savalimmiullu naligiinnerusumik Nunat Avannarliit Siunnersuisoqatigiiffianni inissisimalernissaannik qulakkeerinninniarneq aammalu namminerisamik ilaasortanngornissamik kissaat naammassiniagassaraarput. Naatsorsuutigaara naqqaniit aallarteqqinnata killiffitsinnit ingerlaqqissinnaasugut, aamma naatsorsuutigaara ataatsimiittarnigut ingerlaannassasut, Aaja Chemnitz naggataatigut oqarpoq.