Kalaallit Nunaat aamma Savalimmiut kissaateqarput Nunat Avannarliit Siunnersuisoqatigiiffianni tamakkiisumik ilaasortanngussallutik. Nunat taakku ukiut ingerlanerini Nunat Avannarliit Siunnersuisoqatigiiffianni oqartussaaqataanerulernissamik naligiinnerusumillu sunniuteqarsinnaalernissamik anguniagartik annertuumik sulissutiginikuuaat.

Alloriarnerujussuaq, kissaatigisap tungaanut alloriartitsisussaagaluartoq februarip naanerani isumagineqartussaagaluarpoq, Savalimmiut sinnerlugit folketingimi ilaasortap Anna Falkenbergip Sambandsflokkurinimeersup aammalu Kalaallit Nunaat sinnerlugu folketingimi ilaasortap Aaja Chemnitzip Inuit Ataqatigiinneersup piffissaq kingulleq atorlugu perulluliorsimanngitsuuppata siunnersuutip tunuartinneqarneranik kinguneqartumik.

Danmarkip Naalagaaffiata Nunat Avannarliit Siunnersuisoqatigiiffiannut aallartitaasa siulittaasuat, Lars-Christian Brask Liberal Alliancemeersoq siunnersuuteqaraluarpoq Kalaallit Nunaata aammalu Savalimmiut aallartitaasa siulittaasui Nunat Avannarliit Siunnersuisoqatigiiffiata siulittaasoqarfianni aalajangersimasumik inissaqartinneqalissasut.

Siunnersuutini tunuartittariaqarsimavaa

MP Lars-Christian Brask (LA) Sermitsiaq.AG-mut oqaluttuarpoq siunnersuutigisaraluani tunuartiinnartariaqalersimallugu, siumoortumik nalunngereeramiuk taamatut iluseqarluni ilalerneqartussaanngitsoq:

- Uanga assorsuaq soqutigisarivara Kalaallit Nunaata aamma Savalimmiut Nunat Avannarliit Siunnersuisoqatigiiffianni namminneerlutik nunartik sinnerlugu aallartitatik aqqutigalugit kissaatiminnik pingaartitaminnillu oqalussinnaalerlutillu aalajangiisinnaatitaalernissaat. Taamaammat aallartitat siulittaasuattut inissinninnut atatillugu suliara siullerpaaq tassaavoq kinguarsaanertaqanngitsumik tamanna naammassiniarneqassasoq. Taamaattorli sillimasimanngilanga ilimagisimanagulu Kalaallit Nunaat aamma Savalimmiut sinnerlugit folketingimi ilaasortat suliniummut unikaallatsitserujussuarnissaminnik pilersaaruteqarsimasut, taakkumi siunnersuutigeriataarpaat aallartitat akunnerminni namminneq toqqartassagaat kina siulittaasoqarfimmi issiatitaasassanersoq.

- Uanga nammineq isumaga naapertorlugu tamanna iluaqutaanissamininngaaniit paatsiveerussaataaginnartussaavoq. Tassami nunat aallartitaasa siulittaasui siulittaasoqarfimmiissappata pissusissamisoornerpaasussaavoq, folketingimi ilaasortaq aammalu Danmarkip Naalagaaffiata Nunat Avannarliit Siunnersuisoqatigiiffianni aallartitat siulittaasuat, Lars-Christian Brask Sermitsiaq.AG-mut oqarpoq.

Aallartitat siulittaasuat paatsuungavoq

Tamaani nunatsinni Inatsisartut sinnerlugit Nunat Avannarliit Siunnersuisoqatigiiffianni aallartitat siulittaasuat, Mariane Paviasen pisoq pillugu assut paatsuungavoq:

- Aaja Chemnitzimit mailikkut allaffigineqariasaarpunga aperineqarlunga Nunat Avannarliit Siunnersuisoqatigiiffiata aalajangersimasumik siulittaasoqarfianiilernissatsinnik soqutiginninnersugut. Paasinarsivoq folketingimi Danmarkip aallartitaasa siulittaasuata aaqqissugaanik siunnersuutip suliarineqalinnginnerani piareersarnerit ingerlanneqartut, tassalu Kalaallit Nunarput Savalimmiullu Nunat Avannarliit Siunnersuisoqatigiiffiata siulittaasoqarfiani aalajangersimasumik inissaqalernissaat qulakeerniagaalluni.

- Soorunami soqutiginnippugut, aamma siunnersuut tapersersorparput, naak tusarniaaffigineqaqqaarata suliaq aallartinneqarsimagaluartoq. Taamaattorli aamma tassanngaannaq ilisimatinneqarpugut 29. februar ataatsimiinnissaagaluarput allannguutissatut siunnersuummik takkuttoqarmat taamaatinneqarsimasoq, aallaqqaammullu paasigaluarpara kinguartinneqaannarsimasoq, maannali aatsaat paasivara siunnersuut tunuartinneqarsimasoq, Kalaallit Nunaata Inatsisartui sinnerlugit Nunani Avannarlerni Siunnersuisoqatigiit aallartitaasa siulittaasuat, Mariane Paviasen Sermitsiaq.AG-mut oqaluttuarpoq.

Brask: Maanna Kalaallit Nunaat Savalimmiullu alloriarnissaat utaqqisaalerpoq

Danmarkip Naalagaaffiata aallartitaasa siulittaasuat, Lars-Christian Brask pisoq pillugu assut ajuusaarpoq:

- Aalajangiisuusumik alloriarsinnaagaluarpugut Kalaallit Nunaata Savalimmiullu ullumikkumit annertunerusumik sunniuteqarnerunissaat anguniarlugu, assullu ajuusaarpunga isumaqatigiissuteqanngitsooratta. Naatsorsuutigaarali Kalaallit Nunaat aamma Savalimmiut siunnersuummik nutaamik saqqummiussissasut, Lars-Christian Brask erseqqissaavoq, naggataatigullu Inatsisartunut Naalakkersuisunullu imatut kaammattuuteqarluni:

- Maluginiarpara Kalaallit Nunaannit aammalu Savalimmiunit naligiinnerusumik pisoqannginnera pillugu naammaginninnginneq annertusiartuinnartoq, iluatsingajapparput oqaluttuarisaanermi pingaarutilimmik alloriassalluta. Taamaattorli suleqatigiinnermit tunuartilerneq aaqqiissutaanngilaq, tamatta immitsinnut atorfissaqartippugut, aamma Nunat Avannarliit Siunnersuisoqatigiiffianni Kalaallit Nunaat Savalimmiullu atorfissaqartippagut, taamaammat neriuutigivara tamatta naammagisinnaasatsinnik aammalu naligiinnerusumik aallaavilimmik naammassisaqarsinnaajumaarluta, qularutigineqassanngilarlu nangittumik tamanna anguniarlugu sulinera ingerlatiinnassagiga.

Folketingimi ilaasortaq Aaja Chemnitz pisoq pillugu oqaaseqartinniarlugu Sermitsiaq.AG-mit sulissutigaarput.