Kullorsuarmi talittarfimmiit meterit tallimat ungasitsigisumiiippoq qeqertaasaliaq taliffissatut sanaaq maanna sikkussaaqqasoq.

Qaasuitsup kommuniata aamma Namminersorlutik Oqartussat nunaqarfimmi talittarfigissaaniarlutik 5 millionit koruninik aningaasaliillutik ukiut marluk matuma siorna sanatitaraat.

- Suliap naammassineqarnerani pakatserujussuarpunga, Kullorsuarmi aalisartut piniartullu peqatigiiffianni KNAPP-imi siulittaasoq Thimotheus Petersen qeqertaasaliap pituffissap inernera pillugu oqarpoq. Kullorsuarmi nunaqarfimmi aqutsisuni 201-6imi siulittaasuunermini inatsisartunut ilaasortamit ilisimatinneqarpoq nunaqarfimminni talittarfik allilerneqalersoq.

- Paasileriallarparput pituffissiaannaq, oqarpoq nassuiaallunilu nunaqarfimmiuulluni 5 millionit koruunit nalitoorujussuusut, taakkulu talittarfiliornermut nutaamut atorneqarsimannaagaluartut.

- Atortussat Qaqortumiit ujarassuit assartorneqarput, maani ujaraqarsimannginnerpugut. Suliariumannittussarsiornermi aningaasat taamatut atorneqarnerat uggornarpoq, Thimotheus Petersen oqarpoq.

Kullorsuarmi talittarfigissaariaraluarnerup iluatsinngitsup uparuarnerani nunaqarfimmi aqutsisuni siulittaasumit aamma nunaqarfimmi niuertuusumit Edvard Nielsen Aronsenimit aamma Arctic Fishimi tunitsivimmi pisortamit Anders Nielsenimit taperserneqarpoq.

- Taanna “qeqertaaraliaq” asuli assiliaataannartut isigaarput. Quianaannarporluunniit isigalugu, talittarfeeqqatsinnulluuniit atanngilaq, Anders Nielsen oqarpoq.

- Qaleralinnik qerisunik avammut annissuinermiluunniit qeqertaasaliaq atorneqartanngilaq.

- Massakkumut nutaajunerminiit aserfallakkiartorpoq, tassa makkuninnga kivitsissutinilluunniit atortoqanngilaq, tassa prammit kivitsissutai atorneqartarput, Edvard Nielsen Aronsen oqarpoq nassuiaallunilu prammimik nioqqutissat tikiussorneqarneriniluunniit tulaffigineqartanngimmat.

Inuussutissarsiornermut Nukissiuutinullu Naalakkersuisoqarfimmit allagaatinik takunnikkumanermik piumasaqaammut atatillugu akissuteqaramik, ima nassuiaapput.

- Suliniut ilisimatinneqarnerput naapertorlugu 5 millionit koruunit missaannik naleqassangatinneqarpoq. Ilisimatinneqarnerpullu naapertorlugu aningaasaliissutigineqartut kissaatigineqartumut atorneqarput. Aningaasaliissutit nunaqarfinnut puljemit aaneqarput. Nunaqarfinnut puljemit aningaasat kommunit nunaqarfinni suliniutinut sulianullu kissaatigineqartunut aallartinneqarusuttunullu atorneqartarput. Tamannalu tunngavigalugu suliniutip neriuutigineqartunut naapertuunnersoq kommunimut apeqqutigisariaqassavat, immikkoortortami pisortaq Christian Hjerrild Ovesen Inuussutissarsiornermut Nukissiuutinullu naalakkersuisoqarfimmit allappoq.

Avannaata Kommunianit Sermitsiap allagaatinik takunnikkumaneranut suli akisoqanngilaq, soorlu aamma apeqqutit assigiinngitsut akineqanngitsut, soorlu makku: Qaqortumut sooq ujaqqanik sioqqanillu aalleqqaartoqartariaqarsimava? Aamma qeqertaasaliamik suliap inernera qanoq nalilerneqarpa? Aalisartunit, umiarsuarnit aamma tunitsivimmit qanoq iluaqutigineqarnersut kommunimut nalileqquarput.  

Talittarfik aserfallattoq

Kullorsuarmi Upernavimmiit kilometerinik 300-nik ungasitsigisumiittumi 431-inillu inuttussuseqartumi maanna talittarfitoqaqarpoq aserfallattumik nutaanngilisumillu, talittarfik kivitsissutaasinnaasunilluunniit atortoqanngilaq.

- Pitsaanngitsumik inissisimavugut, tassa eqqarsaatigalugu, nunaqarfinnut pajuttaateeraq Vestlandia talissinnaanngilarluunniit, prammit atorlugit ikaassuisoqartarpoq, nunaqarfimmi aqutsisuni siulittaasoq Edvard Nielsen Aronsen aamma niuertuusoq oqarpoq.

- 2016-imi tusaamalerparput talittarfik ilasussaasoq, soorunami neriulluarpugut, massakkut talittarfipput nunaqarfiup angissussaanut uuttuullugu mikisuaraagami aserfallassimallunilu, Edvard Nielsen Aronsen oqarpoq.

Kullorsuarmiut Arctic Fiship tunitsiviannut qaleralinnik tunisisarput. Tunitsivik qaleralinnik 650 tonsinik qerititsisinnaassuseqarpoq. Aasami umiarsuaq siulleq qerititsivimmik imaarsisussaq tikikkaangat piffissaq sivisooq atorlugu umiarsuarmut prammi atorlugu ikaassuisarput. Qalerallit qerisut karsinut palitsniitunut (scantainerinut) immiullugit ikaassuunneqartarlutik.

- Qerisut nassiunniarneri kigaattarpoq assut, ilaannikkut 1 time sinnerlungu pram-i utaqqisinnaasarparput, aatsaallu uteraangat ikaassueqqilertarluta. Qerisut (scantainer) qaleralinnik imallit sukkasuumik aakkiartortarput, ingammik kiassuaartillungu imaluunniit siallertilluni. Taamaasilluni qalerallit pitsaassusaat apparsinnaasarpoq, Anders Nielsen oqarpoq nassuiaallunilu inuit ikaassuinermi sulisartut.

- Pitsaanerusinnaavoq talittarfik anginerusuuguni, sulineq pitsaanerussagaluarpoq sukkanerullunilu. Taamaasilluta aattoornerit annikinnerussagaluarput, Anders Nielsen oqarpoq.

Qeqertaasaliaq pituffik

- Iluaqutaanngilaq, prammimik usingiaasarneq usilersuineq ingerlanneqartarmat.

5 millioninik atuilluni suliaqarsimaneq atorsinnaanngilaq, sakkortugaluarpalluunniit akisussaasunut utertittariaqarpoq, naalakkersuisunngortut suliamik misissuinissaat kissaatiginarpoq, KNAPP-imi siulittaasoq Thimotheus Petersen oqarpoq.

- Eqqortumik oqassagaanni nunaqarfimmut siuariaataanngilaq, inernera tissinaannarpoq quianaannarpoq, Nunaqarfimmi aqutsisuni siulittaasoq Edvard Nielsen Aronsen oqarpoq nukillalaajummeqalunilu nangilluni.

- Imannak aamma sanasui attaveqartorsuunnginnamik uagutsinnut, tusatsiakkat naapertorlugit Qaqortumi qaartiterivimmnut ujaqqanik aallertoqarsimasoq, Edvard Nielsen Aronsen oqarpoq nassuiaallunilu ujaqqat sioqqalluni qeqertaasaliamut immiissutigineqarsimasut.

Nunaqarfimmi pilersuisumi niuertutut siorna perngaammik qeqertaaraasaliaq atorneqarmat takuaa.

- Soorunami umiarsuaq una pajuttuutigineqartoq talissinnaanngimi atorsinnaanngilaa, kisianni ukiarluinnarnerani immikkut ukiuunerani pilersuutissat nassiunniarneranni, suliniartoqarmat, imaluuniit pilersaarutit ilallugit Ivalo Arctica Kullorsuarmut pajutsinneqarmat, pernarluta takuarput umiarsuarmik talittoqarnerani pituffigalugu atorneqartoq, Edvard Nielsen Aronsen oqarpoq.

- KNAPP-imit iluaqutigineqanngilaq, tunisiniarnermiluunniit iluaqutaasinnaanngilaq.

Mallit mangiarusaalereerpaat, siorarsuit ujarassuillu katagalereersimapput, malissuartarami, Thimotheus Petersen oqarpoq. Thimotheus Petersen qeqertaasaliap naammassineqarnerani nunaqarfimmi aqutsisuni siulittaasuuvoq, taamanilu inuussutissarsiornermut naalakkersuisuusumut Vittus Qujaukitsumut naammagittaalliuuteqarluni saaffiginnissuteqarpoq.

- Naalakkersuisut siulliit allakkanik pajoreerpakka, piareerlugu suliarineqarnissaa anguniarneqartariaqartoq. Vittu naalakkersuisuujunnaarmat suliaq qatangiinnarpoq

nunaqarfinni siulersuisuni siulittaasuuninni allakkatigut anngussaqarnikuugaluarpugut, Thimotheus Petersen oqarpoq.   

Iluarsiisoqarnissaa pisariaqartinneqarpoq

Kullorsuarmi piniartut aalisartullu Kullorsuaq inuussutissarsiornikkut inerisaanissamut periarfissarissaartoq nalilerpaat.

- Aalisarneq decembarip 12-ani aallartippoq, majip aallartinnerata tungaanut 650 tonsit imaralugit tunitsivik ulikkaarpoq, tassa massakkut aalisarneq unittoorpoq. Qaleraleqarfinnik nassaartoqarpoq ukioq manna, qaleqarfilissuarmik. Pilissuaq, eqqarput tamarmi qaleqaleqarfeqarpoq, Kullorsuup avannaatungaani, kilometerit 30-t missaa avannarpasitsigisumi, Edvard Nielsen Aronsen oqarpoq.

- Qaleralinnik tigooraasarpugut annerusumik allanik tigusisanngilagut. Ukioq kingullleq containeritaarnikuuvugut, taava 655 tonsit missaani tiguagut, Anders Nielsen Arctic Fishimi tunitsivimmi pisortaq oqarpoq.

- Tunitsivitsigut inerisaasoqaraluarpat pisariaqanngilaq avataaniit sulisunik tikisitsinissaq. Soorlu maanna nunaqarfinni Kullorsuup kujataaniiittuni Tasiusami Innarsuunnilu allaat Kullorsuarmiit suliartortoqarpoq, ilaatigut sulisussat amigarmata, ilaatigut Uummannamut eqqaanut aamma suliartortoqartarpoq, taqqavani sulisussat amigarmata, Edvard Nielsen Aronsen oqarpoq. Sisimiunilu issittumi attaveqaatinik pillugit ataatsimeersuarnermit DTU-mi lektorip Kåre Hendriksenip oqariartuutaa innersuullugu, tassami inuussutissarsiutinik inerisaaniaraanni attaveqaatit aamma inerisarneqartariaqartut oqariartuutigimmagu.

- Kalaallit Nunaanni sumi tamani inuussutissarsiornikkut periarfissarpassuaqarpoq. Soorlu Uumannami aamma Upernavimmi qaleralinniarneq angallannikkut assartuinermit tapersersorneqanngikkaluartoq, taava inuiaqatigiit tassani sulinertik ingerlatiinnarpaat, naak assartuinermi angallanneq pisarialik piunngikkaluartoq, taava sulinertik ajunngitsumik ingerlanniarsarisarpaat. Sumiiffinni taakkunani innuttaasut agguaqatigiisikkaanni avammut tunisinermi annerpaamik isertitaqartitsisaraluarput. Sumiiffinni taakkunani angallannikkut assartuinermi periarfissanik pitsanngorsaasoqaraluarpat, taava qaleralik iluanaarutigineqarnerusassagaluarpoq, aamma sumiiffimmi suliareqqiinissaq periarfissanngussagaluarpoq, taamaasillunilu Kalaallit Nunaat isertitaqarnerulluni. Taamaasilluni inuussutissarsiornikkut ineriartortitsineq angallannikkullu attaveqaatit imminnut ataqatigiilliuinnarput, DTU-mi  lektori Kåre Hendriksen oqarpoq, tamaatullu oqariartuut Thimotheus Petersenimit taperserneqarpoq, pitsanngorsaasoqarnissanullu iliuuseqartoqartariaqalernerarpaa.  

- Nunatta karsianut immersuisuuvugut, nunatta karsianit pilersorneqarnerlunnerpaalluta, mumisittariaqaripput, tunitsivinni qerititsiveqarneq eqqarsaatigalugu aalisarneq unippoq, assersuutigiinnarlugu umiarsuit kujataani ingerlasaqattaarput, qerititsivinnik imaajaallutik. Taamatut pineqanngisaannarpugut, umiarsuit suli periarfissalerujussuugaluarpoq, uninngavoq inuussutissarsiornerput, Thimotheus Petersen oqarpoq.

- Tunitsiveqarnikkut Kullorsuarmi inerisaasoqarnissamut tikilluaqqunaqaat, maanna Arctic Fishitut taasat allamik pilersaaruteqartoqaraluarpat, saniatigut allat eqqarsartoqalerpat akitigut Kullorsuarmi aalisartunut iluaqutaaginnassaaq. Kullorsuarmi inerisaasoqaraluarpat sulisussaaleqinngilluaasarlutik aalisakkerivinnik ingerlatsisinnaagaluarpugut, Edvard Nielsen Aronsen oqarpoq.

Uani ataani Sermitsiaq aviisimut digitaliusumut isissutissarsisinnaavutit: