B-67 IT-79-mut akiniaasoq
Ukioq kingulleq sølvinnattut pissartanngorsimasut IT-79 5-1-mik ajugaaffigaat
Ukioq kingulleq pissartanngorniutivittoqarnerani finalertut IT-79 aamma B-67 ataasinngormat unnukkut unammipput.
Unammineq aallartisimatsiaannartoq B-67 siuapallappoq. Unamminerup immikkoortuata siulliup naammassilernerani IT-79 1-2-mut isertitsivoq, taamaattoq muminnissamut siggartoqanngitsiartoq B-67 isertitseqqippoq.
Unammineq B-67-mit aqunneqarpoq qularutissaanngitsumillu 5-1-mik ajugaallutik. Taamaalillutik B-67 ukioq kingulleq finalimi IT-79-imut ajorsarsimanertik akiniutigaat.
Angusat allat
Pulje A-mi Upernavimminngaanneersut UB-83 unamminermi siullermi ajorsarsimasut aappassaanik unamminerminni ajugaapput. Taakku Kugsak 45 4-1-mik ajugaaffigaat. Ilulissaninngaanneersut Nagdlunguak’ GM-ertoqarnerani siullermeerlutik unammipput. Taakku NÛK 4-0-mik ajugaaffigaat.
Qeqertarsuaminngaanneersut G-44 pissartanngorniutivittoqarnerani aamma aatsaat ajugaapput. Taakku Tasiusaminnganneersut Eqaluk 54 2-0-mik ajugaaffigaat.
Marlunngornermi unammisussat:
Pulje A:
Nal. 13.30: Kagssagssuk - Nagdlunguak
Nal. 17.30: NÛK - Kugsak
Pulje B:
Nal. 15.30: K-33 - Eqaluk 54
Nal. 19.30: G-44 - IT-79
