Maanna Qaanaami meeqqat illersuisortik Aviâja E. Lynge oqaloqatiginissaanut periarfissaqalerput.

Meeqqat Illersuisuata kiisalu MIO-p inatsisitigut tunngavilimmik suliassaasa ilagaat nakkutigissallugu, Kalaallit Nunaanni meeqqat atugarisaat Naalagaaffiit Peqatigiit Meeqqat pillugit Isumaqatigiissutaannut naleqqunnersut.

Taamaattumik maajip naanerani Meeqqat Illersuisuat aamma MIO Qaanaamukassapput, meeqqat atugarisaat pillugit meeqqanik inersimasunillu oqaloqateqariartorlutik kiisalu meeqqat pisinnaatitaaffii pillugit siunnersuiartorlutik ilitsersuiartorlutillu.

- Meeqqat, inuusuttut kiisalu inersimasut meeqqat pisinnaatitaaffii pillugit ilisimasaat nukittorsassallugit kiisalu meeqqat pisinnaatitaaffii unioqqutinneqarneranik misigisoqarpat siunnersuiniarluta ilitsersuiniarlutalu Qaanaamukalerpugut. Peqatigitillugu tikeraarnitsinni, inuiaqatigiinni tamani meeqqat
assigiinngitsunik ukiullit qanoq inuunerannik pingaarutilinnik ilisimasaqalissaagut, Aviâja E. Lynge tusagassiuutinut nalunaarummi allappoq.

Tikeraarnermi meeqqat inuusuttullu MIO-mit naapitsillutik oqaloqateqarnissamut periarfissaqassapput, kissaatigigaannilu kinaassuseq isertuunneqarsinnaavoq. Tamatuma saniatigut MIO pisinnaatitaaffiit pillugit atuartunik sammisaqartitsissaaq, atuarfimmik kommunimillu ataatsimeeqateqassalluni, kiisalu MIO-p
atuartut ineqarfiat pulaassavaa.

Angalaneq piffissami 2018-imi 30. majimit 6. junimut pissaaq.