Royal Arctic Linep angalanissamut pilersaarutini nutaaq atulersippaa, umiarsuarlu Tukuma Arctica ullumikkut ataasinngornermi siullermeerluni Bremerhavenimut tikissaaq. Eimskipip umiarsuaa Bruarfoss februaarip naanerani sanaartornermi maskiinassanik assartuisuuvoq.

„Tyskit niuerfiat atorneqalissasoq“ Royal Arctic Linemi pisortaaneq Niels Clemensen Sermitsiaq.AG-mut oqarpoq.

- Cuxhavenimili suliffissuaatiminni tunisassiaminnik Bremerhaven atorlugu nioqqutissanik usingiaasoqartarumaartoq Royal Greenlandip arlaleriarluni nalunaarutigaa, umiarsuaatileqatigiiffiup pisortaa oqarpoq.

CO2-mik aniatitsinnginnerusoq

Taamaalilluni Bremerhavenimit Royal Greenlandip suliffissuinut marlunnut Cuxhavenimiittunut containerit assartorneqartarneri, Aarhusimit Cuxhavenimut assartorneqartarnerinut sanilliullugu Royal Greenlandimut aqqut sivikinnerussasoq, oqarpoq.

Bremerhaven Cuxhavenimit 43 kilometeriinnarnik ungasitsigaaq, Cuxhavenilu Aarhusimit 270 kilometerit missaanni ungasitsigaluni.

- Royal Greenlandip CO2-mik aniatitsinera eqqarsaatigalugu iluaqutaasorujussuuvoq, Niels Clemensen oqarpoq.

Royal Greenlandip tyskinik suleqateqarnera Aarhusimi containerit amerlassusaannut sunniuteqarpallaarnavianngilaq, John Aage Nielsen, Royal Arctic Linemi sullitanut pisortaagallartoq CCO-ugallartorlu, naapertorlugu, Aarhusimi tusagassiorfik Din Avis Aarhus, allappoq.

Annikitsunnguit appariartussapput

- Assartukkat amerlassusaat procentinngorlugit allannguuteqangaarnavianngillat. Ingerlaannaq annikitsunnguit appariartussapput, John Aage Nielsen aviisi naapertorlugu naliliivoq, nangillunilu:

- Europamulli nioqqutissat Bremerhavenimut ingerlaartinneqartalernissaat piffissap ingerlanerani pissusissamisuussaaq. Nunanili allani tunisassiortut Danmarkimi qerititsiviliortarnertik ingerlatiinnarpaat. Nioqqutissat sumut pissanersut nammineq aalajangissavaat, uagulli Bremerhavenimik ilanngussinerput killilersuinngilaq.