Piniartitsinissamut piffissaliussat pisassiissutillu piffissami 2015-imi aasaaneraniit 2018-imi ukiuunera ilanngullugu atuussimasut aalajangerneqartunut aallaaviupput.

- Taamaallaalli uumasoqatigiit pillugit ilisimasat nutaat, inuussutissarsiutigalugu, sunngiffimmi aamma tammajuitsussanik piniartut pisassiissutinik, piniarfinnik aamma piniarnissamut piffissaliussanik atuisimanerat kiisalu kommuniniit minnerunngitsumillu tammajuitsussarsiornermik inuussutissarsiortuniit nalunaarutigineqartartut tunngavigalugit annikitsumik aaqqiisoqarluni, Aalisarnermut, Piniarnermut Nunalerinermullu Naalakkersuisoqarfimmut tusagassiuutinut nalunaarummi ilisimatitsivoq.

Akiliisitsilluni Tuttunniarnermut Umimmanniarnermullu piffissaliussat pisassiissutillu aasaaneraniit 2018-mi ukiuunera 2021-mi ilanngullugu atuuttussat uani takukkit.

Sisimiut-Kangerlussuaq-mi (Piniarfik 2) marts-mi 2018-mi tuttunik umimmannillu kisitsineq Pinngortitaleriffimmiit ingerlanneqareerpoq marts-milu 2019-mi Akia-Maniitsoq-mi (Piniarfik 4) aamma Ameralimmi (Piniarfik 5) tuttunik kisitsinissaq pilersaarutaalluni soorluttaaq Nunatarsuarmi umimmannik kisitsinissaq. Kisitsinerit pineqartut kisitsinerillu allat inerneri pillugit pisassiissutit aamma piniartitsinissamut piffissaliussat allannguuteqarsinnaassapput.

Inuussutissarsiut siuariartorfiusoq​​​​​​

Tuttunik umimmannillu akiliisitsilluni piniartitsisarneq inuussutissarsiutaavoq siuariartorfiusoq. Akiliisitsillunii piniartitsinermi 2017-mi umimmaat 354-it tuttullu 138-it pisarineqarput. Tamanna 2016-mut sanilliullugu siuariartorneruvoq taamanimi umimmaat 236-iinnaat tuttullu 79-iinnaat pisarineqarsimallutik. Akiliisitsilluni piniartitsineq ukiuni taakkunani Nunatta Karsianut toqqaannartumik aningaasanik isertitaqarfiuvoq.

Akiliisitsilluni umimmanniarnermit akitsuutitigut isertitat:

• 2016: 312.000 koruunit

• 2017: 548.000 koruunit

Akiliisitsilluni tuttunniarnermit akitsuutitigut isertitat:

• 2016: 79.000 koruunit

• 2017: 138.000 koruunit

- Naalakkersuisoqarfik isumaqarpoq aalajaatsumik ajunngitsumillu sinaakkutissiornikkut inuussutissarsiut annertusiartuinnarumaartoq aamma Kangerlussuup avataani, piniarnermut naalakkersuisoqarfik allappoq.

Tammajuitsussarsiniartitsiniarnermut allagartallik kisimik

Nalunaarut atuuttoq malillugu akiliisitsilluni piniartitsisarneq Kalaallit Nunaanni najugaqavissunit aamma Kalaallit Nunaannut akileraartartunit kisimi aaqqissuunneqarsinnaavoq.

- Akiliillutik piniariartartut tassaagajupput sullitat europameersut amerikameersulluunniit uumasunik qaqutigoortunik nunarsuarmi sumiluunniit akiliilluni piniarneqarsinnaasunik aningaasarpassuarnik akiliillutik piniarusussinnaasartut. Piniariartut soqutiginerusarpaat tiggaat angisuut utoqqaat taakkulu tammajuitsutut Kalaallit Nunaanniit angerlaanneqarnissaat, Piniarnermut Naalakkersuisoqarfik ilisimatitsivoq.

50.000 koruuninik atuiumasartut

- Nunanit allaneersut piniariartartut Kalaallit Nunaanni umimmannik tuttunillu tammajuitsussanik piniarnissaminnut 50.000 kr.-it angullugit atorumasarpaat. Tamanna timmisartunut bilitsit tunineqartut, unnuisarnerit, tammajuitsussanik piniarnissamut aaqqissuisartut ikiortaanullu akissarsiat, Namminersorlutik Oqartussanut akitsuutit, kommuninut aamma Namminersorlutik Oqartussanut akileraarutit, Naalakkersuisoqarfik allappoq.

Aalisarnermut, Piniarnermut Nunalerinermullu Naalakkersuisoqarfik nalunaaruteqarpoq, akiliuteqarluni aallaaniarneq aalisarnerlu pillugit nalunaarut nutarterlugu aallartinneqareersoq. Nutarsaanermi naatsorsuutigineqassaaq akiliuteqarluni piniartitsinermik aaqqissuisutut akuersissummik pissarsiniarnermi piumasaqaatit sukateriffigineqarnissaat. Aamma piniartitsinermi guide-qartarnermut tunngasunik sukannerusunik piumasaqaateqalissaaq. Kiisalu akiliutinut tunngasut allanngortinneqassapput nalimmassarneqarlutillu.