Tele-Post 2017-imi aamma 2018-imi teknologinut nutaanut 630 millionit koruuninik aninigaasaliinissamut pilersaaruteqarpoq. Periusissatut pilersaarut 2020-ip atungaanutatuuttoq annertooq aqqutissiuisuuvoq, allannguinerillu amerlasuut ulluinnarni ingerlatsinermut aamma atuisut kiffartuunneqarnerinut kinguneqartinnaveersaarneqarput.

Sulisut unammillerneqartut

- Aningaasaliinissanut pilersaarutit annertuut sulisunut ilungersortitsipput. Anguniakkat aalajangiussimasagut anguniarnerini aatsaat taama unammillerneqartigaagut, pisortaq Kristian R. Davidsen, Sermitsiaq.AG-mut oqarpoq.

Ingerlatseqatigiiffiup pilersaarutigaa – naak aningaasaliinissamut pilersaarutit annertugaluartut – ukiumiit ukiumut sulisut ikilisarneqarnissaat, kisianni tamanna pissusissamisoortumik suliunnaartoqarneranik pisassasoq pisortap naqissuserpaa, atorfillu inuttaarutsillugu atorfinitsitsisoqaqqissanersoq isumaliutersuutigineqarluartassasoq.

- Oqimaaqatigiissaarinerup nassaarinissaanut tamanna tunngavoq, suliagut pitsanngorsaatigalugit, saniatigut sulisut ilungersuuteqarnerisigut, pisortaq pissangalluni suliffeqarfiup iluani misissuinermik utaqqisimasoq nassuiaavoq, tassani sulisut akornanni iluarisimaarinninneq takutinneqarpoq.

Iluarisimaarinninnerulertut

- Annertuumik suliffimmi tamanut ilungersornartumik anguniagaqaraluarluta, sulisut iluarisimaarinninnerat ukiup siulianut sanilliullugu qaffariarpoq, pisortap ersarissumik nuannaartup tamanna saqqummiuppaa.

Akerlianik atuisut iluarisimaarinninnerat appariarpoq, tamannalu ukiakkut 2017-imi attaveeruttoornernik arlalinnik pissuteqarpoq.

- Tassanngaannartumik ilimaginngisamik attaveeruttooraangatta sulisut ulluinnarnut sanilliullugu artukkerneqartarnerat qularutissaanngilaq, tassanilu atuisut soorunami qisuariarlutik nassuiiaanneqarusuttarput. Allannguinerni pilersaarutaasuni tamanna allaaneruvoq. Sulisut tassani piareersarsinnaasarput, pisortaq nassuiaavoq, ukiuni makkunani ingerlatseqatigiiffiup allanngoriartornera malinnaaffigalugu soqutiginartorujussuusoq taanna isumaqarpoq.

- Maanna nutaanik sanaartuleruttorpugut, taakku atuisut pitsaanerujussuarmik kiffartuunneqarnerinik qulakkeerissapput. Siullermik internet sukkanerusoq aamma nioqqutit nutaat suliarineqarput. Maajimi mobilitigut attaveqaatit pitsaanerulersissavagugut, taamaalilluni 4G-mut pissalluni, tassanilu atuisugut pitsaanerusumik misigisaqartinnissaat qulakkeeqqillugu, Kristian R. Davidsen oqaluttuarpoq, periusissatut pilersaarutip annertuup piffissaliiffigineqarnerata malinneqarnissaanik taanna akisussaasuuvoq.

Mobilitigut attaveqatiini 4G-mut nuutsitsineq qaammatip tulliani nunaqarfimmi Nuup Kangerluani Kapisilinni aallartissaaq. Teknologi Ericsson nutaaq pisiarineqarnikuuvoq, taassumalu illoqarfinni mikinerni nunaqarfinnilu immap naqqatigut kabelimit anguneqarsinnaanngitsuni, mobilikkut internetteraangata naammaginartumik atugaqarnissaat qulakkiissavai.

Aningaasanut ikinnerusunut data annertunerusoq

Mobilinik atuisut akit allanngornagit datamik annertunerusumik mobilit pillugit periusissiaq neqoreerfigisarnissaannut tunngavoq.