Aalisarneq pillugu inatsisissamut nutaamut innersuussutit arlallit oqaasertalersorneqarnissaannik suliaqarneq ukiuni marlunni ingerlanneqarsimavoq, maannalu Aalisarneq pillugu Ataatsimiititaliarsuup suliaqarnera ingerlalluarsimammat Naalakkersuisunut, Inatsisartunut aalisarnermillu inuussutissarsiuteqartunut innersuussutit inaarsarlugit suliarineqalersimapput.

Inaarsaaneq

- Suli marlussoriarluta ataatsimiinnissarput pilersaarutigaarput isumaliutissiissummi sammisat kingulliit inaarsassallutigit, massakkulli allallugu aallartinnissaanut naammattunik atortussaqalereerpugut. Isumaliutissiissut pilersaarutit naapertorlugit juunip naanerani piariissaaq, Jens Paulsen, Aalisarneq pillugu Ataatsimiititaliarsuarmi siulittaasoq tusagassiorfinnut nalunaaruteqarnermi oqarpoq.

Ataatsimiititaliarsuup apriilip 13-iani aqqanilissaanik ataatsimiinnerani aalajangiunneqarpoq ammasumik ingerlatsisoqassasoq, kikkut tamarmik ukiuni marlunni kingullerni nalunaarusiarineqarsimasunik, nunamilu inuussutissarsiutit annersaanni pingaarnersaannilu ajornartorsiutaasunut nassuiaataasimasunik takunnissinnaanngorlugit.

- Innersuussutissat isummerfiginissaannut naammattumik ilisimasaqarnissaq siunertaralugu tunuliaqutissiissutit ataatsimiititaliarsuarmi ilaasortanut tunniunneqarput. Tunuliaqutissiissutini sammisat qaammarsaavigineqartut paasisaqarfiginissaannut tamat tassa periarfissaqalerput, Jens Paulsen nassuiaavoq.

Killiffik unammilligassallu

Oqaaseqaatit tunuliaqutissiisut arlalinnut tunngassuteqarput, raajarniarnerullu, aamma sineriarmmut qanittumi aqutsiveqarfimmi 47-mi qaleralinniarnermi sineriammullu qanittumi saarullinniarnermi unammilligassanut nassuiaataallutik. Aamma sulisoqarnermut, ilinniartitaanermut aalisarnermilu piginnaasanik ineriartortitsinissamut tunngassuteqartut allaaserineqarsimapput. Aalisarneq pillugu Ataatsimiititaliarsuup erseqqissaassutigaa, oqaaseqaatit tunuliaqutsissiisut innersuussutinik imaqanngitsut.